Subzonic

de summer isches ganzi 10 jahr här, wo de grundstei für subzonic gleit worde isch. e langi ziit! die 10 jahr sind prägt worde, vonere ussergwöhndliche fründschaft und ere chliine erfolgsgschicht. agfange hät alles im früehlig 1992. de roman camenzind und siin langjährige schuelfründ arsi montsenigos gründed e band. scho nach churzer ziit, wird dur de dani weber am bass, us dem duo es trio. zu dere ziit treit mer i de band langi haar und hät nur ein traum, mer will en gitarre-sound wie metallica. im summer 92 träffed de arsi und de soldi im 10. schueljahr ufenand. de soldi (als einzige mit churze haar) kännt widerum de bisang us de schuelziit und bringt ihn zu de band. grad zu dere ziit zeiged faith no more, das härti gitarre und sprächxang beschtens harmoniered. so agschpornt, hät de roman d'idee, näbed de guete alte rock'n'roll inschtrumänt au es keyboard i d'band z'integriere. hüt unfassbar, aber ein teil vo de band hät das dazumal völlig ungeil gfunde. aber trotzdem isch als letschts member vo de ursprüngliche formation, am roman siin bruefsschuelkolleg silvan vogelsanger (keybords), zu de truppe gschtosse. jetzt hät also nur no en name gfählt! "aces in the hall", so händ sich die 6 jungs ganz am afang gnännt und fliessig probet (was det au bitter nötig gsi isch!). bald scho händs s'erschte konzert gäh und das im pfadiheim in oerlike. gschpillt hät mer luut, schnäll und meischtens ohni fixe tegscht! improvisiere isch agseit gsi. im erschte übermuet hät mer s'gfühl gah, d'wält erwarti die band mit offne arme. "centurion", under däm name hät mer ab jetzt welle d'wält erobere. es isch 1993 und i de zwüscheziit isch de fredi als verstärkig i d'band gholt worde. i dere zämesetzig hät mer wiiteri konzert gäh, under anderem au de legendäri geburtstags-gig im waldhuus chatzesee. im winter 94 gänd die 6 en bahnbrächends konzert ufem davoser jakobshorn und das zäme mit de zürcher dialekt-hip-hop combo primitive lyrics. (bi froschtige minus-temperature!). im gliiche jahr wird s'erschte demo in eigeregie ufgno. de roman hät alles zu siim fostex-4 spur recorder usegchützled, doch kei plattefirma hät es ohr defür gha! inere notfallmässige bandsitzig hät mer dänn nacheme bessere name gsuecht und mit subzonic au eine gfunde. im 95i verlaht de silvan d'band und de oli götze übernimmt d'taschte. dank ihm chunnt au d'myrto zu de band wie d'jungfrau zum chind. subzonic sind komplett gsi! so gschtärkt hät mer sich hinder d'produktion vonere semiprofessionelle demo-cd gmacht. jede hät siin sparstrumpf g'opferet, und mit de hilf vom martin weidmann isch es guets stuck subzonic entstande. voll motiviert hätt mer das demo i de schwiiz umeverschickt. näbed ville absage hät d'xenia schlegel vo de sonymusic inträsse zeigt. 1996 hät d'xenia d'band dänn au es paar mal live under d'lupe gno und isch vo de live-qualitäte so überzügt gsi, das sie subzonic en plattevertrag abotte hät. so motiviert hät d'bänd mit de arbet zu ihrem debut album "subzonic" agfange.
1997 isch mer s'erschtmal in es professionells tonstudio und hät i rekordziit s'debut ufgno, wo im april 97 veröffentlicht worde isch. d'singleuuskopplig "ziit" wird bi drs3 uf d'playlist gno und de name subzonic wird en begriff. i de folg organisiert s'management gadget die erschte grössere konzert. s'highlight i dem jahr wird so de uftritt uf de grosse bühne am st.galler open air. so vill platz händ die 8 no nie gah und so hät mer spontan es böckli-gumpe lanciert, wo de fans bis hüt i de chöpf blibe isch. 1998 tourt d'band dur d'schwiiz und fangt im herbscht mit de vorproduktion zum zweite album aa. im februar 99 erschiint "update 99". dank de erschte single "üngluck im päch" werded au d'lokalradios uf die jung band ufmerksam. im summer passiert dänn s'unerwartete und de song "titelgschicht" us em soundtrack zum film "exclusiv" schtosst uf platz 2 vo de single-hitparade vor. er wird über 28 000 mal verchauft und "titelgschicht" wird die meischtverchaufti mundart cd-single aller ziite. das heisst gold! zu dem ziitpunkt produziert d'band under de regie vom roman camenzind alles sälber und de erfolg git ihne rächt. dank em erfolg vo titelgschicht, werded subzonic für vill konzert buecht und spilled - dur en usfall vonere englische band - mit erfolg sogar 2 mal am gliche tag am gurten-festival. ändi 99 taucht mer wieder ab und schafft am album "achterbahn", wo im september 2000 mit de single "spiegelbild" lanciert wird. d'band isch mittlerwiile erwachse worde, das aber ohni d'verspilltheit und de muet fürs neue z'verlüüre. "achterbahn", stiigt uf platz 2 vo de lp-charts und nach 3 wuche gits gold für 25 000 verchaufti tonträger. endi 2000 gaht mer en neue wäg und bringt mit em "wiehnachzong" und em dezueghörende video abwächslig i die iiheimisch musigszene und is langwiilige wiehnachtsgschäft. subzonic zeigt charakter und d'lüüt sind begeischteret. agschpornt vo dem achtigserfolg, schiebt mer afangs 2001 d'single "baby" mit gwahgtem video nah. vill wird drüber gredt, gschribe und kritisiert, doch d'band laht sich nöd beirre und staht bis hüt zu dem wunderschöne, erotische clip! ändi 01 git de bassischt und fründ dani weber de ustritt und d'band brucht en neue bassgitarrischt. dank de myrto und ihrem mafiaartige beziehigsnetz isch schnäll en passende ersatz gfunde und so stosst de marcel schwegler zu subzonic. die ganz band isch überrascht gsi, wie schnäll und unkompliziert sich de schwegi sich is bandgfüheg iigläbt hät. so gfeschtiget und motiviert fanged d'arbeite zum 4.studioalbum aa. vom juni bis und mit dezember wird usprobiert und gschaffet wie wild. 2002 subzonic sind motiviert und veröffentliched am 8.4.2002 ihres neue album "stereo" und dänn folged natürlich diversi live-konzert i de ganze schwiiz.